NEW Washington — Nagapati si New Washington Mayor Shimonette Peralta-Francisco nga magatau it mas mabahoe nga benepisyo ro ginaplanong New Washington-Batan Bridge.
Suno kana nga ro tulay nga magakonekta sa banwa it New Washington ag Batan hay makabulig sa pagpadasig it pagbiyahe it mga residente, pagpabaskog it negosyo, ag paghimo it mas maabung oportunidad sa ekonomiya para sa mga komunidad nga direktang maaapektuhan it proyekto.
Ginaeaumann nga magiging importanteng imprastraktura ro nasambit nga tulay bangud nga magatau raya it mas maayos nga koneksyon sa tunga it daywang banwa ag magaserbing bag-ong aeagyan para sa transportasyon it mga tawo ag produkto.
Raya hay kasunod it ginpatigayon nga ocular inspection it French bridge designer nga si Engr. Phillip Gouvary kaibahan ro mga lokal nga opisyal agud nga usisaon ro mga posibleng lokasyon para sa pagpatindog it tulay, adlaw it Biyernes, Mayo 29.
Padayun man ro koordinasyon it mga lokal nga gobyerno ag mga eksperto agud nga maisueong ro proyekto nga ginaeauman nga magadaea it dugang nga kaumwaran sa Aklan sa oras nga mataw-an it katumanan.
