KALIBO, Aklan—Nag-apela it bulig sa gobyerno ro grupong “We Are Boracay” matapos maka-eksperyensiya it gutom ag kalisod bangud sa ginapatuman nga community quarantine tuga it coronavirus disease ukon Covid-19 pandemic.
Nagpangayo man raya it suporta ag donasyon para sa mga pamilya ag inunga nga naduea-an it trabaho.
Suno kay Rosario Moleta it ‘We Are Boracay’ nga eubos ro andang pagkalisod umpisa nga nagpatuman it nagkaeain eain nga klase it community quarantine sa probinsya it Aklan.
Nasayuran nga kaabuan sa mga establisiyemento sa isla it Boracay hay ginpasarado samtang ro iba hay nagpatuman it flexible work arrangement kung sa siin maabong indibidwal ro naduea-an it opurtunidad ag trabaho.
Maabong mga business owners ro nagakalisod sa pagbayad it renta ag utility payments bangud zero bookings raya umpisa nga ginkansela ro international flights.
Ro isla it Boracay hay uman nga nagbukas para sa mga bisita maghalin sa Western Visayas umpisa ko June 16 apang kapin eamang sa 1,244 travelers ro nailista umpisa sa nasambit nga petsa hasta August 9.
Bangud owa it trabaho ag kita, nagapangayo it financial support ro grupo agud nga mapatuon ro andang unga sa uman nga pagbukas it klase para sa school year 2020-2021.
Dugang pa kara nga bangud sa ginapangatubang nga krisis, may mga ibang miyembro it grupo ro naghana nga magpakamatay.
