KALIBO, Aklan — Sa tunga it pagtaas it pagkabaeaka tuga it hantavirus outbreak nga konektado sa sangka cruise ship sa Atlantic Ocean, owa pa it nailistang kumpirmadong kaso sa kaabuan it mga nasyon sa Southeast Asia.
Raya ro ginpahayag ni Dr. Philip Ian Padilla, Professor of Microbiology and Public health it UP Visayas.
Suno kana nga ro presenteng outbreak hay gina-angot sa MV Hondius cruise ship kun sa siin pilang pasahero ro nagmasakit ag tatlo ro namatay bangud sa Andes strain it hantavirus.
Maskin nga owa it aktibong outbreak sa Southeast Asia, ginpahayag ni Dr. Padilla nga may mga pagtuon nga nagapakita it presensya it hantavirus sa pilang mga kasapatan sa rehiyon kapareho it eanggam, partikular sa Indonesia ag Singapore.
Sa pihak kara, owa raya nagakahueugan nga may maeapnagon nga human transmission sa rehiyon.
Ro hantavirus hay kaeabanan sigon nga nabobo-oe halin sa exposure sa ihi, eaway, ukon higku it infected nga sapat.
Bihira suno kana ro human-to-human transmission mag-eowas sa pilang strains kapareho it Andes virus nga makit-an sa South America.
Angot kara, panawagan ni Dr. Padilla sa publiko nga ipabilin nga malimpyo ro palibot ag likawan ro exposure sa eanggam ag iba pang rodents agud nga malikawan ro sakit.
