Ko nagtaliwan nga mga domingo, sa mga ginpatigayon nga drugoperations it mga awtoridad, minilyon hasta binilyong balor it mga illegal nga droga ro nadakpan.
Raya hay nagapakita nga aktibo eon man ro mga sindikato it droga sa nasyon .
Waea-tuo ro pagbaligya it binulto nga makabig nga maka-alarma.
Kadungan kara, maabu eon man ro mga nailistang makangieidlis nga krimen nga posibleng may koneksyon sa paggamit it illegal nga droga nga dapat mataw-an it atensyon ro mga natungdan.
Kan-o guid eamang, sangka 15-anyos nga dalagitang biker ro nakit-an nga patay sa magamo nga lugar sa Bulacan.
Sa sangka insidente man sa banwa it Pila sa Laguna, sangka pitong dag-on nga unga ro ginsueod sa sako it rapist nga sangka menor de edad man.
Ginadudahan nga ro mga suspect sa makarondaya nga mga klaseng krimen hay posibleng sa impluwensya it illegal nga droga.
Makaron nga adlaw it Lunes magabukas eon ro klase ag may pilang eskwelahan ro nagapatigayon it in-person classes.
Nagpanawagan ro maabu nga mga ginikanan sa kapulisan nga magpatuman it hugut nga seguridad para sa andang unga bangud nga siguradong magabalik man sa karsadahon ro mga kriminal ag kawatan.
Kabay nga indi eon madugangan pa ro mga biktima.
Kinahangean nga mapabatyag sa mga kriminal ngara nga may ginapatuman nga laye sa eugta .
