KALIBO, Aklan—Mag-eowas sa merito ag substance, ro impeachment complaint hay makabig nga sangka numbers game.
Raya ro ginpahayag ni Atty. Harry Sucgang, sangka political analyst matapos nga gindihon ro 33-pages nga impeachment complaint sa Kamara it nagkaeain-eain nga grupo kahapon kontra kay Vice President Sara Duterte nga may kaibahan nga pag-endorso ni Akbayan Party-list Representative Perci Cendaña.
Suno kay Atty. Sucgang nga pinaagi sa impeachment hay masayuran kon sin-o ro mga matuod nga kaalyado it mga Duterte.
Nagapati man imaw nga raya hay maka-eusot sa kongreso bangud nga kaabuan sa mga kongresista hay kaapin it administrasyon.
Apang pagabantayan ro magiging daeagan kara sa senado.
Samtang, angot man sa napabalitang pagkontra ni Pangueong Ferdinand Marcos Jr. sa planong pagdihon it impeachment complaint kontra kay VP Sara ko nagtaliwan nga mga inadlaw, ginpahayag ni Atty. Sucgang nga paghugas eamang raya it alima .
Ginpaathag nana nga engkaso nga maaprubahan sa Kamara ro reklamong impeachment, pagadaehon raya sa Senado agud nga bistahon ro opisyal nga gustong pahalinon sa posisyon.
Ro mga senador sigon ro magatindog kara nga huwes.
Ro mga impeachable official sa nasyon hay ro Presidente, Bise Presidente, mga miyembro it Supreme Court, mga miyembro it Constitutional Commissions, ag ro Ombudsman.
