Ginkundina it India ro pag-atake sa sangka Indian-flagged cargo ship sa kaeawran nga sakop it Oman matapos nga eumugdang kasunod it ginadudahan nga missile strike.
Sa ginpaguwa nga pahayag it India’s Ministry of External Affairs, gintawag kara nga “unacceptable” ro insidente ag ginbatikos ro padayun nga pag-target sa commercial shipping ag sa mga sibilyan.
Ginkumpirma man it India nga eowas ro tanan nga Indian crew members sakay it barko matapos sanda nga maeowas it mga awtoridad it Oman.
Suno sa maritime security firm, ro barkong eakot hay ro MSV Haji Ali, sangka cargo vessel nga may 14 tripulante ag may kargang livestock halin sa Berbera sa Somaliland paagto sa Sharjah, United Arab Emirates.
Ginasugid nga nakaangkon it mabaskog nga pagsabog sa barko maeapit sa baybayon it Limah, Oman, sa Strait of Hormuz, nga ginapatihan nga tuga it missile strike.
Matapos ro pagsabog, nagtuhaw sigon ro kaeayo sa barko rason nga gin-abandona raya it mga tripulante bago eubusan nga eumugdang.
Owa pa ginpangaeanan it India kun sin-o ro posibleng responsable sa pag-atake.
Nagapanawagan man ro New Delhi nga dapat likawan ro pag-atake sa commercial vessels ag anumang tikang nga makasab-eag sa freedom of navigation ag pangkalibutanon nga kalakalan.
