Nagpaandam ro Iran nga posibleng maapektuhan ro ginapatuman nga ceasefire understanding kara sa Estados Unidos kun magpadayun ro mga pag-atake it Israel sa Beirut, Lebanon, sa tunga it naga-grabeng tensyon sa rehiyon.
Suno kay Iranian Foreign Minister Abbas Araghchi, ro kasugtanan sa Washington hay nagatumod sa “ceasefire on all fronts, including in Lebanon,” ag anumang pageabag sa sangka lugar hay pwedeng magresulta sa pagkaduea it kabilugan nga kasugtanan.
Ro pahayag hay kasunod it mandu ni Israeli Prime Minister Benjamin Netanyahu nga magpatigayon it airstrikes sa Dahieh district sa Beirut, nga ginatawag nana nga “terror infrastructure” nga may kaangtanan sa mga pag-atake it rocket ag drone nga gina-angot sa Hezbollah.
Ginpahayag ni U.S. President Donald Trump nga padayun imaw nga nakikipag-istorya sa magtimbang nga parte, kaibahan si Netanyahu ag mga representante nga may kaangtanan sa Hezbollah.
Sa anang social media posts, ginpahayag ni Trump nga owa it tropang igapadaea sa Beirut bangud sa ginapatuman sigon nga kasugtanan nga papunduhon ro kinagamo kabaylo it pagpundo it Israel sa pagpamomba sa Lebanon.
Sa pihak kara, owa it kumpirmasyon sa ginasugid nga direktang komunikasyon it U.S. ag Hezbollah.
Ginkumpirma man ni Netanyahu ro pakikipag-istorya kay Trump apang anang gin-insister nga magapadayun ro Israel sa operasyon kontra sa Hezbollah kun magapadayun ro militanteng grupo sa pag-atake sa mga sibilyan it Israel.
