KALIBO, Aklan— Pangkabilugan nga naging matawhay ro biyahe it publiko sa Kalibo International Airport sa pagdumdum it Semana Santa sa idaeum it “Oplan Biyahe Ayos: Semana Santa at Summer Season Vacation 2023.”
Suno kay Engr. John William Fuerte, Manager it Civil Aviation Authority of the Philippines ukon CAAP-Aklan nga naging very peaceful, orderly ag owa it untoward incident sa selebrasyon maskin nga bumuhos ro mga pasahero.
Ginpasaeamatan man it pamunuan it CAAP-Aklan ro publiko eabi eon ro mga biyahero ag mga bakasyunista sa pagbuylog sa andang programa.
Kamana man ro mga airport stakeholder, airline companies ag mga empleyado ag natungdan nga ahensiya it gobyerno.
Samtang, owa suno kana it nadugang sa mga flights, apang may sangka airline company ro nagbaylo it mas mabahoe nga aircraft nga imbes Airbus 320 hay nagagamit it Airbus 321 agud nga maka-accommodate it 175 hasta 180 nga pasahero, kun sa siin haeos fully-booked ro mga airlines.
Sa pihak nga parte, ginpasiguro kara nga magapabilin ro andang hugut nga pagbantay hasta nga matapos ro summer season agud nga magadere-deretso ro manami nga seguridad sa paeuparan.
