KALIBO, Aklan—Obligado eon makaron nga magsuksok it face mask ro mga pumueoyo it banwa it Kalibo.
Raya hay kasunod sa ginbaeay nga resolusyon it Sangguniang Bayan it Kalibo nga nagaengganyo sa tanan nga publiko nga magsuksok it face mask bilang precautionary measures sa pagkalhit it 2019 coronavirus disease ukon COVID-19 pandemic.
Suno kay Kalibo Vice Mayor Cynthia Dela Cruz, raya hay bilang pagsunod eon man sa mando it national government nga mandatory eon ro pagsuksok it face mask sa tunga it COVID-19 pandemic.
Resolusyon sigon ro andang ginbaeay agud nga insigida raya nga maimplementar sa pagsunod eon man it mga pumueoyo.
Ginpahayag dugang nga kon ordinansa ro andang himuon ag ipasa hay maeawig pa nga proseso ag sigurado nga makaangkon it penalidad ro sin-o mang inde magsunod kara.
Suno pa kay Vice Mayor Dela Cruz, haeos tanan man hay nagasuksok it face mask ag ginatinguhaan sigon it lokal nga gobyerno nga makatipon it face mask agud nga may ikata-o sa nagakinahang-ean ag sa ginakueang partikular sa mga frontliners.
Samtang sa pihak nga parte, posible suno kay Vice Mayor Dela Cruz nga mare-align ro andang ibang proyekto agud nga mapondohan it uman ro inug-ayuda sa mga pumueoyo kasunod it extension it enhanced community quarantine sa bilog nga probinsya it Aklan.
Ginpahayag dugang nga anda pang paga-istudyuhan ag pagaistoryahan ro iba pang dugang nga plano agud nga masolusyunan ro ginapangatubang nga krisis kon sa siin ginpaeawig pa ro enhance community quarantine hasta sa Abril 30 it presenteng dag-on tuga it COVID-19 pandemic.
