Ginpasiguro ni House Speaker Faustino “Bojie” Dy III nga preparado eon ro Kamara para sa ikalimang State of the Nation Address (SONA) ni Pangueong Ferdinand Marcos Jr., sa July 27.
Raya ro ginpahayag ni Dy matapos nga pangunahan ro final SONA run-through ag inspeksyon sa plenary hall ag iba pang estratehikong parte it Batasang Pambansa.
Ginpamilit ni Speaker Dy, obligasyon nanda nga siguraduhon nga ro kada aspeto it SONA hay magiging maayos, eowas, ag nagakabagay sa importansiya it nasambit nga okasyon bukon eamang para sa gobyerno kundi para sa kada Pilipino.
Ginmitlang ni Dy nga base sa nakasugtanan it Kamara ag Office of the President hay magiging simple apang may dungog ro SONA kun sa siin magatau ro Pangueo it report sa kahimtangan it nasyon ag sa direksiyong gina-agtunan.
Suno man kay House Secretary General Atty. Cheloy Velicaria-Garafil, haum eon ro extensive contingency measures nga ginaeakipan it pagtaeana sa nagkaeain-eain nga lugar sa Batasan Complex it 30 medical personnel halin sa house medical and dental service.
May dugang man sigon nga medical teams halin sa St. Luke’s Medical Center, Diliman Doctors Hospital, Philippine Heart Center, ag East Avenue Medical Center ag mga first responders halin sa Department of Health (DOH), local government units (LGU), Bureau of Fire Protection (BFP), ag Philippine National Police (PNP).
