KALIBO, Aklan—Nag-abot eon sa kabilugan nga 6, 835 Overseas Filipino Workers (OFWs) sa bilog nga Western Visayas ro nakabaton eon it “DOLE-AKAP for OFWs” program.
Suno kay Niezel Sabrido, tagapaghambae it Department of Labor and Employment (DOLE) Region VI, raya sigon ro mga nga nadueaan it trabaho ukon gin-repatriate nga OFW kasunod it pagpanaeasa it Coronavirus Disease 2019 ukon COVID-19 pandemic
Suno kana nga kapin sa P68 milyon ro allocated budget para sa rayang programa kung sa siin magabaton it kapin sa 10, 000 pesos ro kada benipisyaryo pinaagi sa DOLE Department Order No.212, series of 2020.
Nagaeaum sigon sanda nga maaabo pa ro maabot ag mabuligan nga OFW it natungdan nga programa it ahensya.
Ro mga posible sigon nga mag-avail kara hay ro mga OFW nga nadueaan it trabaho, mga manugbalik eon sa ibang nasyon apang naabutan it lockdown, nakansela ro kontrata ag mga repatriated OFWs kamana man ro mga na-infect it COVID-19 sa andang ginatrabahuhan nga nasyon.
Sa pihak kara, ginapahayag ni Sabrido nga naubos eon ro budget it taeatapan ag nagahueat pa it dugang nga alokasyon pinaagi sa Bayanihan 2 nga kakapirma pa eamang ni Pangueong Rodrigo Duterte agud nga uman nga makapanupod it ayuda.
Samtang, padayun sigon sanda sa pagbaton ag pag-apruba it mga aplikasyon online maskin nga owa pa it budget.
Ro Overseas Workers Welfare Administration (OWWA) sigon ro naga-review sa tanan nga aplikasyon samtang ro DOLE mat-a ro naga-release it financial assistance.
Engkaso sigon nga makaangkon eon it additional funding hay insigida nandang paga-abisuhan ro publiko para sa pag-release it bulig pinansyal.
