KALIBO, Aklan—Nabaton eon ni punong barangay Risa Relojo it Cupang, Banga ro ginpaguwa nga notice of preventive suspension it sangguniang bayan ag pirmado ni Banga mayor Noel Redison.
Suno kay mayor Redison nga ko Pebrero 2 hay nagkita sanda ni kapitan Relojo kun sa siin ginpaathag nana ro pagsuspinde kana sa sueod it 60 diyas ukon haeos daywang buean kaibahan ro anang barangay kagawad nga si Lyzette Ibisate Reposar.
Ro mandu hay kasunod it ginpasaka nga kasong administratibo sa SB-Banga ko 2022 bangud sa dishonesty, misconduct in office ag offense involving moral turpitude.
Nag-ugat ro nasambit nga isyu matapos ro gina alegar nga paggamit it kapitan kaibahan si kagawad Reposar sa pondo it barangay sa personal nga interest nga sangka pag-eabag sa laye.
Ginpaguwa ro suspension order ko pebrero 2 ag eagi man nga ginpatuman.
Ro reklamo hay nauna eon nga gin-endorso sa Ombudsman apang ginpabalik sa LGU-Banga ni Dante Vargas, Deputy Ombudsman for Visayas para sa imbestigasyon.
Nakitaan sigon raya it probable cause rason nga ginsuspinde ro daywang opisyal.
Ro kaso hay padayun nga ginapamatian makaron it ginbilog nga it investigating committee it SB-Banga.
Nakadepende sa daeagan it imbestigayon kon eubusan nga pagakasuhan ro daywa sa Ombudsman.
Temporaryong nagapungko nga punong barangay it Cupang si kagawad Teodosio.
