May mga ginadudahan eon nga kaso it African Swine Fever ukon ASF sa Barangay Arcanghel Sur sa banwa it Balete.
Raya ro ginkumpirma ni Engr. Jun Agravante, Presidente it Federation of Livestock, Hogs and Poultry Raisers sa probinsiya it Aklan.
Suno kana nga gin-umpisahan eon ro pagbo-oe it blood samples sa mga alagang baboy nga gulping nagkaeamatay sa nasambit nga lugar.
Ginahueat pa sigon makaron it Office of the Provincial Veterinarian ro confirmatory test halin sa Deparment of Agriculture Region 6.
Angot kara, gin-isolate eon it asosasyon ro banwa it Balete, kun sa siin gin abisuhan ro andang mga miyembro nga indi anay magbo-oe it baboy idtu nga ginakatay nga kaabuan hay ginadaea sa Isla it Boracay.
Apela ni Engr. Agravante sa LGU-Balete ag Provincial Government nga magplastar eon it Municipal Checkpoints agud nga indi eon makaguwa sa ibang banwa ro baboy halin sa nasambit nga banwa kamana man ro pagbutang it Barangay Border Control.
Mas mayad man sigon kon ipaidaeum eon sa culling operation ro mga baboy nga sakop it 1 kilometer radius halin sa ginadudahan nga apektado it ASF.
Apang dapat nga may nagakaigo nga kompensasyon nga mabaton ro mga naga alaga it baboy.
Hugut nga ginapatuman it Provincial Government ro total ban sa pagpasueod it mga baboy ag produkto halin kara sandig sa Executive Order No. 21 nga ginpaguwa ni Governor Jose Enrique Miraflores ko Marso 8, 2023.
