KALIBO, Aklan—Sa tunga it P2 hasta P5 pesos nga pagtaas sa presyo it bugas sa bilog nga Metro Manila ag pilang parte it nasyon, owa it anuman nga pagbag-o sa baealigyaan kara sa Kalibo public market.
Raya ro ginpahayag ni Municipal Agricultural Officer Uriel Las Piñas it LGU-Kalibo base sa resulta it andang ginapatigayon nga weekly price monitoring ko Marso 24.
Makabakae pa sigon sa tindahan it P38 kada kilo nga regular rice ukon katumbas it P950 pesos kada sako.
Ro pinakamahae hay P55 pesos nga special, ginsundan it 45 pesos nga premium ag 40 pesos nga well-milled rice.
Kaeabanan sigon sa mga ginabaligya hay local rice ukon iya mismo naghalin sa probinsiya.
apang may una man nga naghalin sa ibang probinsiya.
Minimal eamang suno kana ro mga imported rice nga ginabaligya sa tindahan.
Sa pihak nga parte, ginpahayag ni Las Pinas nga owa it dapat nga ikabaeaka bangud nga nagapabilin nga bastante ro supply it bugas tuga it tiempo it tig-aeani.
Eauman sigon nga makaangkon it sangkiri nga adjustment sa presyo kara sa mga buean it tig-taeanom mag-eowas pa nga may ginaeauman nga El Niño phenomenon.
