KALIBO, Aklan—Kun sin-o ro naga-eagas ag nagapamilit nga magpaidaoem sa DNA test hay imaw rong maggastos.
Raya ro direkta nga ginpahayag ni Jerome “Jm” Yabut sangka SK chairman it Brgy. Luctoga, Libacao angot sa alegasyon nga imaw hay nagapanago ag gintalikdan ro responsibilidad matapos nga hanabdus ro nauna eon nga nagdangop sa Bombo Radyo Kalibo nga si Lovely Zaulda.
Hugot karang ginpamalibaran rong alegasyon kana ni Zaulda bangud sa owa sigon imaw it plano nga talikdan ro anang responsibilidad kun mapamatud-an nga imaw gid man ro tatay it ginbun-ag ni Lovely.
Suno pa kana nga ginpinakahuy-an sigon imaw kara rason nga owa imaw nagpabatyag sa anuman nga mga pagcontact kara.
Gamit sigon ro facebook account nga may pangaean it mismong onga ni Zaulda ro nagapost sa social media nga imaw hay scammer.
Angot kara, haom si Yabut nga magpaidaeom sa DNA test apang indi imaw magbayad sa proseso kara.
Nasayuran nga parehong sa idaeom it impluwensya it makahieilong nga ilimon ro daywa kat unang may natabo kanda.
Ginklaro man ni Yabut nga owa sanda nag-iba sa sangka baeay ni Zaulda ag an-um nga buean eon rayang nabdus kat gin-aku kana.
Samtang, owa it problema sa kalive in partner ni Yabut nga si Evelyn Idala kun mapamatud-an nga ro anang nubyo gid man ro tatay it onga ni Zaulda.
Ginapahayag nga nauna paeang hay ginkompronta eon kara si Lovely nga eayuan si Yabut ag nagpakilaea nga imaw ro presenteng karelasyon kara.
Sa baylo sigon nga eayuan hay ginpamalibaran karang may relasyon sa tunga nanda ni Yabut.
Angot kara, limang dag-on eon si Idala ag Yabut nga magkarelasyon ag presenteng limang buean nga nabdus si Idala.
Sa pihak nga parte, naga-apela ro daywa kay Zaulda nga punduhon eon ag likawan ro mga pagpakahuya kanda ag tapuson eon ro isyu sa matawhay nga pamaagi.
