KALIBO, Aklan–Nagpatigayun it inspeksyon sa fish section it Kalibo Public Market ro lokal nga gobyerno kaibahan ro Fishiries, Policy and Law Enforcement Group it Bureau of Fisheries and Aquatic Resources (BFAR) kainang agahon, Marso 10.
Suno kay Joanne Brunio, Fishery Technologist it LGU-Kalibo nga kaparte it programa it BFAR ro pagpatigayun it market denial sa mga merkado publiko sa bilog nga probinsya it Aklan.
Ro ginakampanya sigon makaron it taeatapan hay ro kaundan it Joint Administrativbe Order 01-2014 ukon conservation it mga blue swimming crab.
Raya hay kasunod it nagasangkiri eon nga populasyon kara rason nga kinahang-ean maproteksyonan.
Mag-euwas kara, ginsikyar man nanda ro mga iligal nga ginadakop nga isda ag iba pang endangered species nga ginabaligya sa tindahan.
May pila sigon sanda nga ginsita partikular ro mga vendor nga nagabaligya it kasag nga owa nakasueod sa standard size nga 10.2 centimeters.
Ginpaandaman man kara ro mga vendor nga likawan ro pagbaligya it mga ginabawaean nga klase it isda.
Ro sinuman nga madakpan nga mag-eabag hay pagakumpiskahon ro andang baligya ag posibleng magapangatubang it penalidad nga P2,500 sandig sa naga-eksister nga Municipal Ordinance.
