KALIBO, Aklan — Patay ro sangka 75 anyos nga lolo matapos nga mapilitan nga mag-tabok it suba agud nga eagson ro anang alagang anwang sa Barangay Poblacion, Libacao.
Naeumos ro biktimang si Rufino Ortega Villorente Sr., residente it nasambit nga lugar.
Suno kay PO2 Richie Pantoja it Libacao PNP nga nasaksihan it pilang residente ro pag-eagas it biktima sa anang alagang anwang nga nagatabok it suba.
Pila sigon sa mga tawo hay nagpaandam nga indi mag-eusong sa suba ro biktima bangud nga mabaskog ro sueog it tubi, apang owa nagpamati ro magueang.
Natumba sigon ro biktima sa suba ag owa eon nakabutwa rason nga insigidang ginpahisayud sa anang unga nga si Rolly Villorente.
Insigida man nga nag-responde ro mga tawuhan it MDRRMO Libacao nga kon sa siin narekober ro magueang nga owa eon it kabuhi.
Gindaea pa raya sa Libacao ospital apang , gindeklarang patay eon.
