NEWS Analysis– Sa Oktubre 30, 2023 eon ro Barangay ag Sangguniang Kabataan Elections ag maabu eon nga kandidato ro nagapabatyag.
Maabu eon nga mga nagsoeputan nga tarpaulin it kandidato nga nagatamyaw it nagkaeain-eain nga mensahe.
Nakasab-it ro tarpaulin sa lugar nga madaling makita it residente.
Apang bukon eamang it raya ro nabatyagan sa nagahilapit nga eleksyon.
Nabatyagan man ro kinagamo.
May mga napabalitang pagpatay sa barangay officials sa probinsiya.
Ro mga ginapatay hay magapa-ilihir sa pagka-barangay chairman.
Sa report it Philippine National Police (PNP), 30,068 elected officials ro may valid firearms ag posibleng kaibahan kara ro barangay officials.
Ro maka-alarma hay 8,313 kara ro expired eon ro mga lisensiya.
Bangud kara, gina engganyo it PNP ro elected officials nga mag-renew eon it andang natungdan nga mga lisensiya agud nga indi makaangkon it problema.
Ro pagtuhaw it kinagamo sa nagahilapit nga eleksyon ro naging rason agud nga hinyu-on sa Commission on Elections it siyam nga mayors it mga banwa ag siyudad it Negros Oriental nga suspendihon raya.
Grabeng kinagamo sigon ro nagaputos sa probinsya rason nga dapat anay nga suspindihon ro election.
Ginpahayag it PNP nga haum sanda sa pagpatigayon it barangay elections sa Oktubre.
Indi dapat maging kampante ro PNP ag siguraduhon nga maubos ro loose firearms agud nga owa it kinagamo.
May mga barangay chairmen nga may mga bodyguard ag private armies.
Tapnaon it PNP samtang temprano pa agud nga indi makapakalhit it kinagamo.
Indi pagpasugtan nga makaalagwa ro loose firearms.
