Naging madinaeag-on ag makolor ro opening program it kauna-unahang pag-host it Passi City sa Western Visayas Regional Athletic Association Meet ukon WVRAA 2026 nga ginpatigayon sa Ricardo P. Palmares Sr. Memorial Sports Complex sa Brgy. Bacuranan sa nasambit nga lugar, hapon it Martes, Marso 17, 2027.
Antes ro programa, nagpatigayon it parada ro masobra sa 7,000 nga delegado nga ginaeakipan it student-athletes, coaches, chaperones, ag technical personnel halin sa waeo nga dibisyon it Region 6.
Halin sa traditional nga limang provincial school divisions nga ginaeakipan it Aklan, Antique, Guimaras, Iloilo, ag Capiz hay magadugang sa kompetisyon sa kauna-unahan nga kahigayunan ro tatlong city school divisions nga Passi City, Iloilo City, ag Roxas City.
Kadungan kara, ginpahayag ni Department of Education ukon DepEd Regional Office 6 spokesperson Hernani Escullar Jr., nga ginapaabot ni Regional Director Cristito A. Eco ro pagpasaeamat sa suportang gintau it City government sa pagpatigayon it WVRAA.
Suno kana nga maskin nga mabahoe nga hangkat ro pagpahaum sa sa sueod eamang it haeos sang dag-on hay naging posible raya bangud sa pagbuylog ag pagbueuligan.
Nauna eon nga ginpahayag ni Passi City Mayor Atty. Stephen Palmares sa opening ceremony nga nagtaeana it pondo ro syudad para nga makatukod ag makapauswag it pasilidad nga pagagamiton para sa nagkaeain-eain nga sports events sa regional meet.
Owa sigon nanda raya ginakabig nga expenses kundi nga investment.
Ro WVRAA sigon hay bukon eamang it kompetisyon kundi sangka selebrasyon it talento ag dedikasyon it mga atleta nga nagatau it dungog sa andang natungdan nga mga lugar.
Samtang, dugang pa ni Escullar nga halin sa mga participants ro magiging mga masunod nga pambato sa mga national ag international competitions.
Ginkalipay it mga tumaean-aw ro performance it mga lokal nga talento it siyudad sa andang salubong kamana man nga gindayaw ro fireworks display ag pagpa-eupad it helicopter nga naghueog it mga confetti nga ginpahaum it Passi City government.
Samtang, makaron nga adlaw it Miyerkules hay umarangkada eon ro mga sporting events sa nagkaeain-eain nga playing venues.
