KALIBO, Aklan—Positibo ro Malay Tourism Office (MTO) nga maeampasan ro andang target nga 1.8-milyon tourist arrival makaron nga 2023.
Suno kay MTO head Felix delos Santos, ro numero it mga turista sa Isla it Boracay hay nagsaka it haeos 50 porsiyento sa unang an-um nga buean it dag-on kumpara ko 2022.
Umpisa Enero hasta Hunyo it makaron nga dag-on, naga abot eon sa masobra sa 998,000 ro numero it mga turista.
Dugang pa ni delos Santos nga bangud sa amat-amat nga pagbalik it dating kapagsik it turismo sa isla halin sa naging epekto it COVID-19 pandemic, kumpiyansa sanda nga umabot pa it hasta sa daywang milyon ro tourist arrivals makaron nga 2023.
Bumuhos ro maabung bisita sa isla ko buean it Abril ag Mayo nga umabot sa 421,248 ukon 45 porsiyentong mas mataas kumpara ko nagtaliwan nga dag-on.
Ginaeauman nga mas pang maga doble ro numero it mga dumueuong nga turista halin sa mainland China, South Korea ag Taiwan sa uman nga pagbukas it regional flights halin Incheon, South Korea, Taipei, Taiwan ag Changsha, China.
Nasayuran nga nakalista ro Boracay it tourist arrivals ko 2022 it 1,751,853.
