Aprubado eon it Kamara sa pangatlo ag ulihing pagbasa ro Fiscal Year 2023 General Appropriations Bill (GAB) ro P5.268 trillion nga pangbansang pondo.
Sa botong 289-Yes, 3-No, 0-Abstention nga gin-anunsyo ni House Speaker Ferdinand Martin Romualdez, ginpabakod it mga kongresista ro House Bill 4488.
Madumduman nga “certified as urgent” ni Pangueong Ferdinand Marcos Jr.ro hagna, rason nga insigidas nga napasa it kamara sa pangaywa, hasta ag ulihing pagbasa sa sueod eamang it sang adlaw.
Una eon kara hay ro pag-eusot sa pangaywang pagbasa, “subjecht to amendments” nga paga-aprubahan it sangka 5-member small committee nga ginakaeakipan nanday Reps. Zaldy Co ag Rep. Stella Quimbo nga chairman ag senior vice chairman it House Appropriations Committee kaibahan sanday Majority Leader Manix Dalipe ag Minority Leader Marcelino Libanan nga kung siin sanda ro magabaton it “individual amendments” para sa hagnang pangbansang pondo.
Ro P5.268 trillion nga proposisyong pangbansang pondo para sa masunod nga dag-on, ro kauna-unahang national budget sa idaeom it administrasyong Marcos.
Raya eon man ro ginakabig sa makaron nga pinakamataas nga proposisyong pangbansang pondo sa kasaysayan it nasyon.
Samtang, nauna eon kara ro pagpunto it economic team nga ro tuyo it administrasyong Marcos hay maboue ro 6.5 hasta 8.0 porsiyentong minatuod nga pag-umwad it Gross Domestic Product (GDP) kada dag-on sa tunga it 2023 hasta 2028 para maboue ro sang digit ukon 9.0 porsiyentong antas it kapobrehan sa dag-on 2028.
