Kalibo, Aklan-Masobra sa P13,000 nga mga senior citizen ro ginbo-oe it Department of Social Welfare and Development Field Office 6 sa Social Pension program.
Sa kabilugan nga 13,468 beneficiaries, 1, 327 ro natukiban nga may ginabaton nga pension halin sa Social Security System (SSS) ag Government Service Insurance System (GSIS); 830 ro nagabaton it honorarium ukon sweldo; 331 ro nagabaton it regular nga suporta halin sa andang pamilya; samtang ro iba pa hay namatay eon kamana man nga may nagsaylo ag indi eon ma-locate.
Suno kay DSWD 6 director Atty. Carmelo Nochete, raya ro rason nga gin-validate it uman ro listahan. Pahayag nana, mas maabu ro mga katigueangan nga nagakinahangean it pension.
Ginpaatman man it director nga ro mga nagabaton it pension, apisar nga sangkiri eamang nga kantidad hay indi pwede nga makabaton halin sa DSWD bangud nga klaru raya nga nakabutang sa Memorandum Circular 06 Series 2024 ukon ro “Enhanced Omnibus Guidelines in the Program Implementation of the Social Pension for Indigent Senior Citizens.”
Tuyo it programa nga mabuligan ro pang-adlaw adlaw nga kinahangeanon ag medical requirements, mapahagan-hagan ro pagtuhaw it gutom sa andang sector, ag ma-mitigate ro rason it pagpabaya sa mga indigent senior citizens.
