NATIONAL News — Sangkiri eamang ro nagasunod sa maximum suggested retail price (MSRP) para sa karneng baboy kun sa siin owa pa naka-abot sa 10% it mga nagabaligya suno sa Department of Agriculture (DA).
Ko Marso ginpatuman it DA ro MSRP it baboy nga P350 kada kilo it pigue ukon kasim, P380 sa kada kilo it liempo, ag P300 per kilo sa parte it ueo.
Suno sa DA, 10% eamang it mga nagabaligya ro nagasunod sa MSRP.
Uman nga ginpueong it DA ro mga stakeholder it swine industry antes ro Semana Santa ag ginpabutyag it taeatapan nga nagpasugot ro mga raya nga bantayan ro andang mga kaibahan para magsunod sa MSRP.
Nagpaandam man si DA Undersecretary Dante Palabrica nga kinahangean nga sundon it stakeholders ro kasugtanan sa MSRP para indi eon magpatuman pa it mas mabaskog nga market interventions.
Bilang kaparte it mas mabuhayan nga solusyon, ginpahayag ni Palabrica nga maga-gastos ro gobyerno it P1 bilyon para uman nga magpaabu it mga baboy sa nasyon.
Suno kana nga gin-aprubahan eon ni Agriculture Secretary Francisco Tiu Laurel Jr. ro swine repopulation program kun sa siin magapanupod it 300,000 nga mga babayeng orok para maging nayon sa mga mabahoe nga farm ag ro mga magiging orok kara ro igabayad sa gobyerno nga igapanupod man sa backyard farmers.
Tuyo it DA nga mapa-abu ro populasyon it baboy sa nasyon sa 14 milyon sa 2028 halin sa waeong milyon sa makaron.
Para makontrol ro presyo it baboy, ro DA eon ro nagabakae it mga baboy nga pagakatayon.
Pagabak-eon it Food Terminal Inc. ro mga baboy ag raya eon ro magadaea sa mga katayan agud nga sanda ro may buyot it suplay agud nga masunod ro MSRP.
