KALIBO, Aklan—Bukon it pabor ro mayoriya it mga residente it Barangay Tinigaw, Kalibo sa ginaproponer nga road widening project partikular sa purok 1 hasta purok 3 paagto sa Kalibo slaughter house.
Raya ro ginpahayag ni Punong Barangay Lourdes Reyes it nasambit nga lugar kasunod it ginpatigayon nga public hearing ko Mayo 5 nga gintambungan it mga residente nga maapektuhan it nasambit nga ginaproponer nga proyekto.
Ginasugid nga ro nasambit nga road widening hay may tig-tatlong metro sa magtimbang nga karsada agud nga mahimo nga 10 meters ro kaeaparon.
Raya hay proyekto sigon it national government nga may pondo nga naga abot sa P35 milyon pesos nga ginpaguwa it Department of Budget and Management ukon DBM.
Sa petition letter, ginasugid kon maduso ro proyekto naga-abot sa haeos 70 nga mga panimaeay ag kurae ro iga-demolish.
Ginareklamo man nanda ro kawad-an it kompensasyon nga igatau sa mga maapektuhan nga residente.
Ro pondo hay iga-download sa munisipyo it Kalibo ag sanda ro nagtumod it proyekto nga pagabutangan kara.
Depensa it LGU nga may pagkinahangean nga mapaeapad ro karsada paagto sa slaughter house bangud nga “double A standard” eon ro kategorya kara makaron.
Tuyo kara nga ma-accommodate ro maabu nga mga saeakyan nga nagasueod-guwa sa nasambit nga lugar.
Angot kara, ginpaathag sigon kanda ni Engr. Marlo Villanueva it municipal planning and development office Kalibo nga posibleng pagabawi-on ro pondo bangud nga hasta eamang sa Mayo 15 ro gintaeana kanda nga deadline agud nga matapos ro mga ginapangayo nga requirements.
Bangud nga owa naila ro mga residente idtu hay indi sanda mapilit.
