Ginboue eon it COVID-19 task force it nasyon ro medical insurance requirement para sa mga estudyanteng magasueod sa limited face-to-face classes.
Ginpasugtan it gobyerno sa unang quarter it dag-ong 2022 ro mga kolehiyo ag unibersidad sa idaeom it COVID-19 Alert Level 1 nga magpatigayon it face-to-face classes sa bilog nga kapasidad, apang ro mga nagasueod sa physical classes hay dapat naka-enroll sa PhilHealth ukon ano man nga insurance provider.
Suno kay Deputy Palace spokesperson Kris Ablan, base sa rekomendasyon it Commission on Higher Education, Seksyon 4, ro item H it joint memorandum circular it CHED-DOH nga may kaangtanan sa medical insurance para sa mga estudyante hay ginboue eon.
Nauna eon nga gintaw-an it atensyon it National Union of Students of the Philippines ro medical insurance requirement, ag ginapatihan nga bukon it tanan nga estudyante hay may kapasidad nga maka-angkon it health insurance rason nga gin-engganyo ro gobyerno nga pondohon eon lang ro nasambit nga sueondanan.
