Mga pumalpak nga vote counting machine ukon vcms , naatrasar nga pagboto ag mahabang pila.
Raya hay pila eamang sa mga natabu sa pag-arangkada it makasaysayan , makolor ag masangag nga national ag lokal nga eleksyon ko lunes, sa tunga gihapon it COVID 19 pandemic.
Pilang oras matapos nga buksan ro boeotohan, pilang VCMs ro kinahangean nga bayluhan nga kaabuan hay sa metro manila .
Base sa protocol, maka-“shade” gihapon ro mga botante sa andang mga balota nga pagakolektahon anay it electoral board agud nga dueueungan nga isalang sa VCM sa oras nga maayos eon raya nga pagasaksihan it mga poll watchers.
Kumbaga maskin nga may aberya sa VCM, padayun ro pagboeotohan.
Sa pilang presinto, nakaangkon man it mahabang pila it mga botante bangud sa na-delay nga pag-umpisa it boeotohan .
Mag-eowas sa pumalpak nga VCM, pilang lugar ro owa pa it poll watchers ag nakaangkon man it pagbaeayluhan it balota .
Sa kahabaon it tiempo it pagpahaum , sa kabahoe it budget para sa ginagamit nga mga VCM, ham-an nga may kapalpakan pa nga natabu.
Maskin nga aminado ro natungdan nga may kalumaan eon ro mga makina ag posible gid man nga pumalpak, ham-an nga owa eagi nasolusyunan .
Ko dag-on 2010 kat mabo-oe it kompaniyang smartmatic ro kontrata para sa pagpa-renta it mga VCM.
Kinahangean nga magpaathah ro comelec ag tanan nga mga nagadumaea sa eleksyon .
Pinaagi kara hay malikawan ro duda bukon eamang sa resulta it eleksyon makaron kundi maging sa mga masunod pang eleksyon.
Kun indi malikawan ro aberya sa makarondaya nga sistema, basi kinahangean eon nga mag-isip it ibang pamaagi.
