KALIBO, Aklan—Ginpatawag it sangguniang bayan it Kalibo ro representante it mga airline companies agud nga mataw-an it sabat ag kaklaruhan kon ham-an it mas maabong flight sa Caticlan Airport kon ikumpara sa Kalibo International Airport.
Suno kay Kalibo sangguniang bayan member Ronald Marte, pila sa naging sabat sigon kanda hay mas convenient sa Caticlan Airport bangud sa maeapit raya nga paeoparan para sa mga turista nga magatabok sa isla it Boracay.
Mag-eowas kara, mas gusto sigon it mga pasahero nga idto sa Caticlan Airport magahugpa ro andang eroplano.
Apang, nagpanindugan ro opisyal nga mas standard ro Kalibo International Airport kon ikumpara sa Caticlan partikular sa runway ag sa tanan nga pasilidad it paeoparan.
Gin-insister ni Marte nga nakadepende raya sa promotion it mga airline companies nga kinahang-ean iduso nanda ro Kalibo International Aiport ag bukon it ro Caticlan Airport nga bukon it eowas partikular sa mga international flight.
Kinahang-ean suno kana nga balansehon ro byahe it mga eroplano nga bukon it tanan hay ibutang sa Caticlan Airport bangud nga maabong sektor ro apektado nga nakadepende ro andang negosyo ag kita sa operasyon it Kalibo International Airport.
Sa makaron suno kay Marte hay nagahimo eon sanda it pamaagi agud nga maibalik ro dating byahe it mga eroplano sa Kalibo International Airport.
