KALIBO, Aklan—Uwa pa naga-sink in kanday Atty. Rea Tabuyo ag Atty. Jiyah Nicole Gonzales matapos nga sambilog ro andang mga pangaean sa 3,992 nga mga nakalistang nakapasar sa November 2022 Bar Examination.
Suno sa daywa nga nag-adto sanda sa simbahan matapos nga nakabaton it manami nga balita agud nga magpasaeamat sa Diyos.
Napasinggit sa sobrang kasadya si Atty. Jiah matapos makit-an ro pangaean sa sobrang kalipay.
Nag-adto raya sa simbahan ag nagpangamuyo kay Sr. Sto. Niño agud magpasaeamat nga may “Atty.” eon raya sa anang pangaean.
Samtang, naging kalmado mat-a si Atty. Rea kon sa siin idto pa imaw sa grocery store ag nagapaabot eamang it mensahe sa nasambitang resulta.
Uwa eon napunggan nga maeoha sa sobrang kasadya ro mga abyan ni Atty. Rea eabi eon si Atty. Pareño kat hambaeon kana nga nakapasar imaw sa bar examination.
Uwa naging madali para sa daywa ro pagiging law student kon sa siin maabo ro naging sakripisyo ag striktong time management ro ginhimo it daywa.
Laygay nanda sa mga aspiring law students nga maging prepared, inde magsurender ag magsalig sa Diyos.
Ginapasaeamatan man it daywa ro andang tagsa ka mga pamilya, kaabyanan, ag mga manugturo nga naging kaparte it andang kadaeag-an.
Graduate it Law sa Central Philippine University ukon CPU si Atty. Jiah kon sa siin imaw hay naging full time student.
Samtang, graduate mat-a sa Aklan Catholic college ukon ACC si Atty. Rea kon sa siin imaw hay naging working student.
