KALIBO, Aklan—Natigayon eon nga ma-install ro 47 nga mga close circuit television ukon CCTV camera sa mga strategic areas it banwa it Makato.
Suno kay Ralph Maypa, tagapaghambae it lokal nga gobyerno it Makato nga ginbutang ro mga CCTV cameras para sa monitoring eabi eon sa daeagan it trapiko ag mga nagkaeain-eain nga mga krimen nga posibleng matabu.
Magaduha-duha eon suno kana ro mga magahimo it krimen ag maga-eabag sa batas trapiko eabi eon ro hit and run incidents ag overspeeding bangud sa mga CCTV cameras.
Sa makaron hay gina-fine-tune eon lang ro mga raya it technician it contractor antes nga iturn-over sa LGU-Makato.
Naga abot sa P1.3 milyon pesos ro gintaeana nga pondo sa pagbakae it CCTV cameras nga halin sa kaban it munisipyo.
Nagtau eon man sigon it instruction si Mayor Ramon Anselmo Martin Legazpi III sa andang municipal engineer nga makaangkon it pagtuon para sa dugang nga installation it mga CCTV cameras sa andang merkado publiko ag mga interior nga daeanon nga eubus nga makabulig sa mga negosyante ag mga turista nga naga-agi sa banwa.
Gindugang pa ni maypa nga may mga nailista nga daeagkuan nga mga vehicular accidents partikular sa diversion road.
Ro monitoring it CCTV cameras hay may koneksyon sa conference hall it munisipyo.
