KALIBO, Aklan—Agud nga amat-amat nga mabuksan ro turismo it probinsya it Aklan nga naga-ambag it mabahoe sa ekonomiya it nasyon, plano makaron it lokal nga gobyerno it Malay kamana man gobyerno probinsyal nga buksan ro isla it Boracay bukon eamang it para sa mga turista it Western Visayas kundi maging sa mga turista it ibang nasyon nga uwa eon it nailistang kaso it Coronavirus disease ukon Covid-19.
Suno kay Malay mayor Frolibar Bautista, raya nga plano hay nabilog sa ginpatigayon nga pueong kaibahan ni Aklan governor Florencio Miralores, LGU-Malay ag tatlong maeagkong stakeholders sa isla nga ginakaeakipan it PCCI, BFI ag CAB.
Kaangot kara, plano nandang makaangkon it October fest agud nga makaengganyo it local ag international tourist agud nga makabulig sa amat-amat nga pagbangon ko ekonomiya it nasyon nga ginpabagsak it pandemya.
Ginkasugtanan sigon it mga bussiness establishment sa isla nga magta-o it 75% discount sa andang mga customer agud mas pang makaengganyo it mga bisita.
Apang, ginklaro ni mayor Bautista nga raya hay sangka plano pa eamang ag nakataeana pa eamang sandang magsumite it resolusyon kon sa siin nakabaehag ro rekomendasyon sa Boracay Inter Agency Task Force ukon BIATF nga imaw ro nagadumaea makaron sa isla pag-abot sa rehabilitasyon ag iba pang tikang nga pwede mahimo sa isla sa tunga it pandemya.
Nasayuran nga halin ko Hunyo 17,2020 hay mga turista eamang it Western Visayas ro ginapasugtan nga makabakasyon sa isla samtang naga-iral pa ro nagkaeain-eain nga community quarantine sa bilog nga nasyon.
