KALIBO, Aklan — Mas pa nga naeubong sa utang ro mga maintok nga mangingisda bangud sa padayun nga pagtaas it presyo it langis.
Suno sa mga mangingisda nga sanday April ag Romeo Magdaluyo, parehong residente it Pook Baybay nga maeaka eon lang sanda nga magpa-eawod makaron bangud sa indi matakuran nga presyo it produktong petrolyo kumpara dati kat barato pa gasolina hay haeos adlaw adlaw sanda nga nagapangisda.
Mabahoe nga porsiyento sigon ro nadugang sa andang gastos sa krudo kada magpa-eawod rason nga ro andang ginakita makaron hay kueang pa sa kinahangeanon it andang pamilya.
Samtang, ginkumpirma man nanda nga hasta sa makaron hay owa pa sanda it may nabaton nga P3,000 nga fuel subsidy halin sa gobyerno.
Panawagan nanda nga kabay nga mataw-an man sanda it nasambit nga ayuda.
Nauna eon nga ginbatikos it Pambansang Lakas ng Kilusang Mamamalakaya ng Pilipinas ro gina alegar nga mahinay ag kueang nga sabat it gobyerno sa padayun nga pagtaas it presyo it langis.
Suno sa grupo nga ro P3,000 fuel subsidy hay haeos bukon it bastante ag pilang adlaw eamang ro igabuhay bangud sa mataas nga konsumo it krudo.
Suhestiyon nanda nga suspindihon eon ro VAT ag excise tax sa langis agud nga insigidang makabulig kamana man ro pagrepaso sa oil deregulation policy.
