KALIBO, Aklan—Dapat nga makaangkon it bukas nga isip ro mga tawo nga nagakontra sa ginaproponer nga pagtukod it casino sa isla it Boracay.
Raya ro ginpahayag ni Malay mayor Frolibar Bautista.
Suno kana nga may sistema ro isla sa pagbaton it mga turista nga gustong maghampang sa casino kamana man ro pagpatuman it minimum health protocols sa Boracay.
Ginpahayag pa nga matapos ro pagpasarado sa isla ko 2018, target it gobyerno nga obrahon eamang raya nga family tourist destination, apang makaron nga nagpasugot eon si Pangueong Rodrigo Duterte nga butangan it mabahoe nga casino ro isla hay posibleng iba eon man ro magiging direksyon kara.
Gindugang pa ni Mayor Bautista nga ro operasyon it casino hay makatau it dugang nga pondo matapos nga grabeng naapektuhan it COVID-19 pandemic ro isla bangud sa kawad-an it mga turista.
Ro lokal nga gobyerno sigon hay makabo-oe it 5 percent it kita it PAGCOR halin sa casino ag makatau it dugang nga trabaho.
Nauna kara, ginpahayag it bilyunaryong si Andrew Tan nga haum eon ro anang kompanya nga Megaworld nga padayunon ro casino project sa Boracay kasunod it pagtau it “go signal” it pangueo nga ginapasugtan eon kara ro sugae sa sikat nga tourist destination.
Ginpahayag ni Philippine Amusement and Gaming Corporation Chair Andrea Domingo nga ginpasugtan eon ni Duterte ro daywang casino projects sa Boracay, ro Megaworld ag Macau-based Galaxy Entertainment Group.
Gindugang pa ni Tan nga ginaduso eon nanda ro Boracay Newcoast, sangka casino project nga temporaryong napundo matapos ro pag-ban ni Duterte sa casino sa isla.
