KALIBO, Aklan–Ginakabaeak-ean makaron it mga residente ag overseas Filipino Workers ukon OFW’s sa Macau, China ro ginaeauman nga pagtaas pa gid it temperatura it kainiton sa nasambit nga rehiyon.
Bangud kara, ginapahayag ni Bombo International Correspondent Emily Delos Santos nga sigidas ro panawagan makaron it Macau government nga likawan eon ro outdoor activities ag permi gid nga mag-inom it maabong tubi agud nga malikawan ro heat stroke.
Ro pinakaulihing temperatura nga andang naeksperyensyahan hay 37 degrees celcius kon siin may naireport nga sangka pinoy worker nga inatake it anang sakit bangud sa sobrang kainiton.
Nagpaandam man ro gobyerno sa mga magueang nga magbilin eamang sa mga lugar nga presko ag inde gid ro mga raya magguwa sa oras kon siin nagasingkad ro silak it adlaw.
Madumduman nga bukon eamang it sa China nakaeksperyensya it heatwave kundi sa iba pang nasyon partikular sa kontinente it Europa.
