Sa makaron nga paniempo nga padayun ro pagtaas it presyo it mga baeak-eon ag serbisyo, kinahangean nga kumayod it mayad.
Maswerte kun may regular nga trabaho ukon maboe-an it panggastos sa adlaw-adlaw.
Para man sa mga owa gid it mausoy nga trabaho, maswerte kon makaibahan sa mga gina-alalayan it gobyerno pinaagi sa mga programa.
Kapareho it Tulong Panghanapbuhay sa Ating Disadvantaged/Displaced Workers o TUPAD Program.
Ro TUPAD hay nagatau it emergency employment para sa mga Filipino workers nga apektado it pandemya, kun sa siin ro mga benepisaryo hay pagabayaran matapos magtrabaho it napueo hasta trenta diyas.
Ro problema, may pila nga bukon man gali it angay ag bagay nga maeakip sa programa.
Kapareho it tatlong benepisaryo it TUPAD sa Davao City nga nabuking nga nagapakuno-kuno eang nga nagatrabaho.
Na-hulicam ro pagpakuno-kuno it sangka babaye ag sangka eaeaki kaibahan ro sangka tagabo-oe it litrato.
Ro tatlo hay ginmanduan nga mag-community service kabaylo it ayuda.
Apang nabuking nga nagabueos-bueos eang ro tatlo it eambong antes nga boe-an it litrato para mahambae nga nagatrabaho sanda adlaw adlaw maskin nga owa man .
Maabu ro nagakinahangean ag mas nagakabagay sa programa nga owa nataw-an it kahigayunan.
Kanugon nga ro tatlo pang pasaway ro naeakip sa listahan.
Klaru nga gina-abuso nanda ro gobyerno ag ginloko ro publiko rason nga dapat sanda nga sampolan.
Kabay nga magaserbi raya nga padumdum sa mga ahensya it gobyerno nga maging madahan ag mapagbantay sa mga ginapatuman nga programa.
Saea-on naton it mayad ro mga benepisaryo, bantayan ro proseso ag kon may mga naga-absuo, kasuhan eon.
