Ginakaeangkagan eon it mga pinoy sa Singapore ro nakataeana nga pagbisita ni Pangueong Ferdinand Marcos Jr. sa Filipino community sa maabot nga Setyembre 6 hasta it 7 it presenteng dag-on.
Suno kay Bombo International Correspondent Anna Marie Zorilla, nag-eaong eon imaw sa anang amo agud nga makatambong sa pagtililipon nga posibleng magadiskurso si Marcos Jr. sa lucky plaza, ro tagpuan it mga pinoy sa nasambit nga nasyon kada adlaw it Dominggo bangud nga raya ro ginata-o nga day-off it andang employer.
Ginaeauman nanda nga makaistorya it presidente si Prime Minister Lee Hsien Loong agud nga mataw-an sanda it dugang nga seguridad bangud nga bukon it tanan nga overseas Filipino workers ukon oFw’s hay ginaswerte sa andang mga amo.
May una pa sigon hasta sa makaron nga uwa ginapakaon it husto it andang amo, uwa it maayos nga eogban ag bukon it manami ro andang sitwasyon.
Eain gid suno kana kon ro mismong presidente it Pilipinas ro magamando ukon magpatuman it laye pinaagi man sa prime minister it Singapore para sa andang kapakanan.
