KALIBO, Aklan—Uman nga igasarado ro mga sementeryo sa banwa it Kalibo sa maabot nga Fiesta Minatay.
Sa interview it Bombo Radyo, ginpahayag ni Kalibo mayor Emerson Lachica nga pagasundon nanda ro anang ginpaguwa nga executive order ko nagtaliwan nga dag-on.
Nasayuran nga base sa ginpirmahan nga Executive Order ni Lachica ko nagtaliwan nga dag-on, igasarado ro mga gate it mga pampubliko ag pribadong sementeryo sa banwa it kalibo umpisa Oktubre 29 hasta Nobyembre 4.
Gin-abisuhan man nana ro mga pumueuyu nga temprano nga mag-agto sa mga sementeryo sa pagdu-aw sa andang mga mahae sa kabuhi nga nagtaliwan eon agud nga malikawan ro pagdueutdutan it mga tawo.
Angot kara, nagpangayo man imaw it pasaylo sa publiko sa pagpaguwa it mandu bangud nga nagapabilin pa suno kana ro paeag it covid-19 ag nasayuran nana nga ro todos los santos hay sambilog sa mga importanteng pista opisyal nga ginadumdum it mga Pilipino.
Gindugang pa kara nga ro pagbisita makaron nga tiempo it pandemya sa patay hay indi dapat nga maabuan ag dueuengan agud nga malikawan ro pagtaeapnan.
Raya hay maskin nga padayon eon ro pagnaba it kaso sa Kalibo ag ro Aklan hay nagapabilin sa General Community Quarantine.
