KALIBO, Aklan—Ginkasugtanan it mga miyembro it Sangguniang Bayan it Kalibo nga pahinyuon eon lang anay sa mga pasahero ro mga tricycle drivers kaangot sa andang hirit nga magpaatas it pamasahe kasunod sa ginapatuman nga sueondanan kon sa siin tig-daywang ka pasahero eamang ro pwedeng makasakay sa sangka behikulo.
Suno kay Ex Officio SB member Ronald Marte, temporaryo malang ro nasambit nga sitwasyon ag inde basta-basta makapataas it pamasahe mas eabi eon makaron nga nagapangatubang sa krisis ro bilog nga nasyon.
Kon magbaeay sigon sanda it ordinansa hay mabuhayan pa raya ag posible nga inde eagi mapasa sa konseho.
Ginata-o eon lang sigon nanda sa Federation of Kalibo Tricycle Operators and Drivers Association Incorporation ukon FOKTODAI ro kahigayunan nga makahinyo sa andang mga pasahero apang inde pwede nga magsobra sa regular nga pamasahe.
Nag-apela man imaw sa mga commuters nga taw-an it konsiderasyon ro mga tricycle drivers apang ginklaro nga uwa it pilitan bangud nga uwa it naga-eksister nga ordinansa kaangot kara.
Madumduman nga nagpadaea it sueat sa konseho it Kalibo ro FOKTODAI kaangot sa anda nga hinyo nga madugangan ro pamasahe it mga pasahero bangud nga bukon sigon it bastante sa pang-adlaw adlaw nga kinahang-eanon it andang pamilya ro presenteng ginakita kon sa siin maskin ro mga nagapangunang baeak-eon hay uwa man naganaba ro presyo.
