KALIBO, Aklan—Nagaabot gihapon sa haeos 4,000 hasta it 5,000 ro numero it mga turista nga nagasueod sa isla it Boracay kada adlaw sa pihak it nagapadayon nga paeag it 2019 novel coronavirus acute respiratory disease (nCov ARD).
Base sa record it Malay Tourism Office, kaeabanan kara hay mga dumueoong halin sa mga maeamig nga nasyon kaparehas it Russia ag Europe.
May kaangtanan kara, natabunan ro pagkaduea it mga Chinese nationals bangud sa ginapatuman nga travel ban halin sa China, Hongkong ag Macau.
Maskin nga nabatyagan eon ro epekto sa ekonomiya ag turismo sa isla, nagapabilin nga normal ro operasyon sa Boracay mag-eowas eon lang sa mga chinese establishment nga nagsarado bangud sa gulpihang pagkaduea it andang mga parokyano.
Una kara, ginmando ni Malay acting Mayor Frolibar Bautista ro temporaryong pagsuspinde nga makasueod sa banwa ro mga tawo nga may travel history sa nasambitang nasyon.
Uman nga ginklaro it alkalde nga uwa pa it kumpirmadong kaso it nasambitang respiratory virus sa bilog nga banwa maskin nga maabo ro ginpaidaeom it Department of Health sa obserbasyon bangud sa pag-angkon it mga raya it travel history sa epicenter it coronavirus.
