New Washington, Aklan—Nagpatigayon it pagronda ag monitoring ro barangay council kabulig ro mga tanod para sa kaeowasan it kada residente it Brgy. Jugas, New Washington, Aklan.
Raya hay angot sa ginakabaeak-an nga sangka misteryosong eaeaki nga nauna eon nga gin-eagas it mga residente apang uwa gid nadakpan hasta sa manhunt operation nga ginpatigayon sa bulig it personnel it New Washington Municipal Police Station.
Suno kay Barangay Kagawad Romel Pronton, gintaw-an eagi nanda it igtaeopangod ro insidente agud nga maaksyunan ro kabaeaka ag kahadlok it mga residente bangud sa makabig nga peligroso ro eaeaki matapos nga gulpi raya nga naduea sa kanipaan it Sitio Soong bitbit ro hinangiban nga siyaw-duko.
Ginpahayag dugang ni Pronton nga gin-alerto eon man nanda ro mga residente it bilog nga barangay ag maging ro mga kaeapit nga lugar angot sa nasambit nga misteryosong eaeaki.
Samtang, ginlaygayan ni Pronton ro anang mga kasimaryo nga inde gid magpakampante ag maging mapagmatyag sa palibot para sa kaeowasan it kada isaea.
