KALIBO, Aklan — Patay ro sangka miyembro it Philippine Marines matapos nga maaksidente sa anang ginamanehong motorsiklo sa Paraiso Road, Brgy. Linabuan Sur, Banga.
Nakaangkon it patal nga lastro sa ueo ro driver nga si Sgt. Michael Romero, 37, residente it Brgy. Paningayan, Madalag matapos nga sumunggab sa nagapalikong saeakyan nga ginamaneho ni Jonathan Laiz, 40-anyos, sangka security guard ag residente it nasambitang lugar.
Base sa inisyal nga imbestigasyon it Banga PNP, halin sa banwa it Kalibo ro rider kon siin pag-abot sa nasambitang lugar hay gulpi eon lang raya sumunggab sa nagapalikong saeakyan.
May kaangtanan kara, insigidang inapok ro biktima sa daeanon ag bangud sa uwa it helmet, naeampos ro anang ueo nga naging kabangdanan it anang hinali nga kamatayon.
Nadaea pa sa Aklan Provincial Hospital si Romero apang gindeklara man nga dead on arrival ni Dr. Edmar Balleras.
Ro aksidente hay padayon nga ginaimbestigahan it mga pulis para sa nagakaigong disposisyon.
