Hakuhit it tubong Malinao nga si Freelyn Flores ro korona it Miss Continental International 2023 sa ginhiwat nga coronation night sa Mumbai, India ku nagtaliuwan nga Nobyembre 23.
Pahayag ni Flores nga ro anang mga inagyan halin it unga hasta naging adulto imaw hay bukon it madali bangud nga kinahang-ean nana nga maging working student bangud nga temprano namatay ro anang ama ag nag-angkon it bag-ong pamilya ro anang ina.
Pero sa pihak ku mga kabudlayan suno kana hay natuto imaw nga maging independent.
Pagsaysay it beauty queen nga nahilig imaw sa modeling bago nga sumabak sa mismong professional stage it pageantry, kapareho man ku anang ina nga mahilig man sa beauty pageants.
Pagsaysay ku daeaga nga maabo man ro mga nagabash kana bangud sa anang mga naubra pero nagpanindugan sigon imaw nga manami ro anang tuyo ag nahimo nana raya para sa anang pamilya.
Ro newly crowned Aklanon hay malipayon sa anang nabuoe nga korona nga anang ginhaead sa anang ina, pamilya ag sa Pilipinas.
Maabo sigon ro mga naging aktibidad nanda sa nasambit nga pageant kapareho it mga press presentation, charity works, advocacies ag abong iba pa.
Pagpaliwanag man nana nga sa mental health ro anang adbokasiya kung siin ngani nga pati man imaw hay naging biktima it anxiety, pero suno kana handa imaw nga ipaeapta ro anang bulig sa mga indibidwal nga nakaka-eksperyensya it makaruyon nga problema.
Suno kana nga Nobyembre 19 imaw nagbyahe kung siin bago sigon ro anang panaw hay maabo nga preparasyon ro ginhimo nana kaibahan ro anang team.
Nagpasaeamat si Flores sa Dios, sa anang pamilya, mga abyan ag sa tanan nga nagsuporta kana halin kat model pa eamang imaw hasta sa anang presenteng kadaeag-an.
Sa makaron hay uwa man ginasara ni Flores ro oportunidad ag puertahan nga mag-intra sa Miss Universe Philippines pero pahayag nana nga gakinahang-ean pa raya it mas mabuhay ag mabahoe nga preparasyon.
