Ginkumpirma it National Bureau of Investigation (NBI) nga nakabaton raya it kopya it arrest warrant kontra kay Batangas 1st District Rep. Leandro Leviste.
Suno kay NBI Director Melvin Matibag, sa abroad sigon si Leviste ag makikipag-angot ro ahensya sa iba pang taeatapan para sa posibleng tikang kontra sa mamalidha.
Makikipag-coordinate ro NBI sa Bureau of Immigration (BI) agud beripikahon ro immigration status ag lokasyon ni Leviste. Makikipag-angot man raya sa Department of Foreign Affairs (DFA) angot sa posibleng mga tikang sa anang passport.
Suno kay Matibag, posible man nga hinyuon sa House of Representatives nga kanselahon ro travel authority ni Leviste. Owa pa sigon it impormasyon kun hin-uno imaw magabalik sa Pilipinas.
Ginpaguwa it Makati Regional Trial Court (RTC) Branch 235 ko Oktubre 5 ro arrest warrant kontra kay Leviste angot sa gina alegar nga pageabag sa Section 25 it Commonwealth Act No. 146, nga gin-amyendahan it Republic Act No. 11659 ukon Public Service Act. Gintaeana ro anang piyansa sa P72,000.
Angot ro kaso sa reklamo it Department of Energy (DOE) kontra kay Leviste ag limang opisyal it Solar Para sa Bayan Corporation (SPBC) ko Mayo.
Suno sa reklamo, napas-eawan sigon ro SPBC nga magpatindog ag magtau it kuryente sa mga customer sa remote, unserved ag underserved areas, kapareho it nakabaehag sa 25-year franchise nga gintau sa kompanya ko 2019 sa idaeum it Republic Act No. 11357.
Si Leviste, nga chairman, president, chief executive officer ag director it SPBC, hay ginpamalibaran kato ro nasambit nga mga alegasyon.
Gintawag ni Leviste nga “super duper hina” ro mga reklamong nakita nana, nga suno kana hay naghalin eamang sa media.
