KALIBO, Aklan–Balik eon sa normal ro operasyon sa Kalibo International Airport.
Raya hay matapos nga ginsarado ro bilog nga Philippine Airspace kahapon bangud sa problema sa radar ag komunikasyon.
Sa pihak kara, maabu gihapon nga mga pasahero ro stranded sa departure area it paeuparan.
Suno kay Mrs. Roldan, sambilog sa mga nagbakasyon sa probinsya it Aklan ag magapabalik eon kunta sa Metro Manila nga dismayado sanda matapos nga maaywan it andang flight.
Nasayuran nga ro pagasakyan kunta nanda nga eroplano it Philippine Airlines hay nakaeupad eon kainang ala-1:30 it aga-aga.
Dugang pa ni Mrs. Roldan nga owa sanda it kasiguraduhan kung hin-uno sanda makaeupad.
Kahapon sigon hay gin-impormahan sanda it ground personnel ag ginbue-an it pilang ka nga mga impormasyon kaeakip ro contact number.
Ginhambaean sigon sanda nga pagatawgan daywang oras antes ro flight apang owa sanda it nabaton nga maskin anong impormasyon ukon abiso.
