Target it Office of the Solicitor General nga magdihon it quo warranto petition kontra kay suspended Bamban, Tarlac Mayor Alice Guo antes matapos ro buean it Hulyo.
Paathag ni Solicitor General Menardo Guevarra nga una sa proseso eon sanda makaron sa pag-incorporate ag consolidate it mga bag-ong ebidensiya nga nadiskubre halin sa imbestigasyon it Senado angot sa ilegal nga operasyon it Philippine Offshore Gaming Operators (POGOs) sa Bamban.
Nauna eon nga ginpahayag it Office of the Solicitor General nga magadihon raya it quo warranto case kontra kay Guo sa mas madaling panyempo matapos kumpirmahon it National Bureau of Investigation nga tumugma ro fingerprints it suspendidong alkalde sa Chinese passport holder nga si Guo Hua Ping nga nagapakitang sanda hay sangka tawo eamang.
Nagdihon eon man ro Office of the Solicitor General it petisyon para kanselahon ro birth certificate ni Guo bangud sa kapas-eawan nana nga makapasa it legal requirements para sa late registration.
