KALIBO, Aklan — Nagareklamo makaron ro mga mangunguma sa Brgy. Mantiguib, Makato matapos nga gina-alegar nga owa ginasunod ro schedule it patubi it National Irrigation Administration (NIA)-Aklan.
Suno kay Punong Barangay Jose Rusia it nasambit nga lugar nga ginatipid ro pagtau kanda it tubi rason nga pila sa andang mga binhi ag tanum nga paeay hay nagkaeasamad eon.
Ginpahayag dugang nga owa it ibang ginasaligan nga patubi ro mga punta nga portion it kaeanasan kundi ro halin sa NIA nga naga-agi sa mga irrigation canal, apang kun ginatipid ro pag-release, maabu nga mangunguma ro maapektuhan bangud sa kakueangan it tubi.
Dugang pa ni Kapitan Rusia nga owa nasusunod ro kada Biyernes ag Sabado nga schedule it pag-release it tubi para sa andang area nga nagasakop sa pilang ektaryang kaeanasan nga ginatunga-tunga it mga farmers nga masyadong kueang rason nga nagapanggil-ang eon ro andang eanas.
Indi eon suno kana maka-abot ro patubi sa mga punta nga lugar kapareho it naeksperyensiyahan it andang barangay ag kaiping nga mga lugar.
Nagakabaeaka sigon sanda nga posibleng mamatay ro andang mga tanum nga paeay kun indi raya maagapan bangud sa mainit nga tiempo.
Nangawa sigon imaw kon ham-an nga owa nakita it mga tawuhan it NIA eabi eon it andang nagalibot nga water tender ro andang sitwasyon .
Apela nana sa NIA nga aksyunan ro andang problema bangud nga kaeabanan sa gina-kapital it mga mangunguma hay gin-utang eamang nanda.
Bukon eamang sigon it sanda ro naka-eksperyensiya it makarondaya nga sitwasyun kundi ro iba pa nanda nga mga kaiping nga lugar.
