P10,000 nailistang danyos sa pagkasunog it sangka stock room it mga gina-obra nga furniture sa Purok 7 Brgy. Bulwang, Numancia 

KALIBO, Aklan–Ginatantiya nga 10,000 pesos ro danyos  sa pagkasunog it sangka stock room it mga gina-obra  nga  furniture  sa Purok 7 Brgy. Bulwang, Numancia  kabi-i.

Suno kay FO1 Jose Marvin Valbuena information officer  it Bureau of Fire Protection ukon  BFP-Numancia nga partially burned eamang  ro stock room nga ginatambakan it mga kahoy.

Ginasugid nga  natabu ro insidente bandang alas-9:41 kabi-i,  kun sa siin insigida man nga nag abot ro mga bumbero.

Nagbueuligan sigon ro mga residente pinaagi sa bucket brigade  rason nga insigidang natapna ro kaeayo  ag  owa man it nadaeahig nga mga panimaeay ag owa it napabalitang naninahan.

Nagapadayun pa ro imbestigasyon it  BFP  sa gintunaan it sunog.