Nakataeana nga magabaton it panibag-ong pasidungog ro boxing legend ag People’s Champ Manny Pacquiao matapos i-anunsyo nga imaw hay magiging kaparte it Class of 2027 it U.S. National Boxing Hall of Fame.
Ginhimo ro anunsyo sa 3rd Pacquiao-Elorde Awards Night nga ginpatigayon sa Manila, kun sa siin ginkumpirma ni Eric Schmidt ro nasambit nga pagkilaea.
Bago kara, naeakip man si Pacquiao sa International Boxing Hall of Fame Class of 2025 sa Canastota, New York. Nakaibahan nana kara ro kaparehong Pilipinong boxing greats nga sanday Gabriel Elorde ag Pancho Villa.
Kilaea si Pacquiao bilang naga-isaeahanon nga eight-division world champion sa kasaysayan it boxing, kun sa siin may una imaw nga 12 major world titles ag naka-bakbakan ro 22 nga world champions sa kabilugan it anang karera.
Sa sueat halin sa National Boxing Hall of Fame, gintumod si Pacquiao bilang “Main Event” inductee para sa Class of 2027.
Gindayaw man ro anang kontribusyon bukon eamang sa boxing kundi maging sa anang serbisyo sa nasyon.
Ginaeauman nga magatambong si Pacquiao sa induction ceremony nga pagahiwaton sa Abril 25, 2027 sa Quiet Cannon sa Montebello, California.
