KALIBO, Aklan—Ginpaathag ni Atty. Harry Sucgang, sangka political analyst sa Aklan nga inde makabig nga kidnapping ro pag-aresto kay dating Pangueong Rodrigo Duterte.
Raya hay matapos nga may legal nga dokumento nga ginpresentar ro International Police Organization ukon Interpol kabulig ro Philippine National Police ukon PNP sandig sa ginserbe nga warrant of arrest maghalin sa International Criminal Court ukon ICC kon sa siin ginpresentar eon it dating presidente ro anang kaugalingon sa ginhimo nga pre-trial it ICC chamber ko nagtaliwan nga Marso 14 oras sa Pilipinas.
Nauna eon nga ginainsister it legal team it dating presidente nga kidnapping ro ginhimo nga pag-aresto kay Duterte, hasta sa daeayon imaw nga ginsurender sa mga otoridad sa The Hague, Netherlands, kon sa siin nakabase ro international tribunal.
Suno pa kay Atty. Sucgang, ginaeauman eon nga pagakwestyunon it kampo ni Duterte ro legalidad it pag-aresto kana antes pa man ro nakataeana nga pagpamati sa Setyembre 23, 2025 kon sa may posibilidad nga inde kara maaapektuhan ro hurisdiksyon it ICC.
Bangud sa naisurender eon si Duterte sa ICC, magapabilin ro andang hurisdiksyon kana.
