KALIBO, Aklan—Ginkalipay it mga vendors ro nakataeanang pag-umpisa sa construction it igapatindog nga 3-storey nga Kalibo public market.
Raya hay kasunod it ginpatigayon nga groundbreaking ceremony.
Suno kay Rosalia Tampos, presidente it fish vendors association sa tindahan nga matapos ro pilang dag-on pagkatapos it nagtuhaw nga sunog, sa wakas hay mataw-an eon it katumanan ro andang handum nga makaangkon it maayos nga baealigyaan.
Ginasugid nga naga abot sa P300 milyon pesos ro gintaeana nga pondo para sa nasambit nga proyekto.
Handum sigon nanda ro maayos nga tindahan agud nga maging masoehay man ro andang pagbaligya ag ro pagbakae it mga pumueuyu kabaliskaran sa andang presenteng sitwasyon nga masyadong maeasa.
Sa pihak nga parte, gindugang pa ni tampos nga owa sanda it ideya kon siin ro igataeana nga relocation site nanda nga mga vendors, apang ginahinyu nanda nga maeapit eamang sa tindahan ro andang pagasayluhan.
Target nga matapos ro proyekto sa sueod it 450 calendar days ukon hasta sa Mayo 28, 2024 base sa pahayag ni Municipal Engr. Amalia Francisco.
