KALIBO,Aklan — Gin-aprubahan sa plenaryo it sangguniang panlalawigan it Aklan ro ginaduso nga resolusyon ni second district board member Plaridel Solidum agud nga usisaon ro circumferential road project it Department of Public Works and Highways ukon DPWH sa bilog nga probinsya.
Sa ginpatigayon nga regular session, ginsambit ni Solidum ro mga uwa pa natapos nga circumferential road project sa daywang distrito it Aklan ag kon anu eon ro presenteng estado kara.
Mag-eowas kara, nataeopangdan nga ro iba sa mga raya hay uwa gihapon it street light nga makabig nga madueom nga daean para sa mga motorist.
Madumduman nga sa uwa pa natapos nga circumferential road project it DPWH sa banwa it Makato hay may mga aksidente nga nag-eontad nga ginkamatay it pilang ka motorista nga nag-agi sa nasambit nga lugar.
